Trasiberia Esperanto-Vagonaro ĉiam validas
Antaŭvide al Pekina U.K. kaj sufiĉe antaŭ la dato de la evento mi lanĉis pere de LOdE la ideon de
….Trasiberia Esperanto-Vagonaro kun vojaĝanta antaŭkongreso kaj
internacia lernejo de esperanto kun specialistoj de rektmetoda instruado
dum la veturado, kun longaj haltoj en fabelaj lokoj kiel Ulan Bator kaj festaj
akceptoj de la enloĝantoj.
La programo ne estas tute nerealigebla se oni serioze okupiĝas pri ĝi per
kunlaboro precipe de rusa kaj ĉina asocioj……. La ideo povus altiri ankaŭ la
intereson de iu grava turisma entrepreno kiu lanĉus la proponon kaj
disvastigus ĝin kapilare per siaj agentejoj.
Ne mankus sloganoj kiel simple:” Eksterordinara travivaĵo : Lernu
esperanton veturante al Pekino”-.”Partoprenu la mondan kongreson de
esperanto lernante la lingvon dumvojaĝe”,”La vagonaro de amikeco”, “Fariĝu
universalaj” kaj simile.
Se la movado volas renovigi siajn fortojn malfermu ĝi la pordon al la mondo
per ĉi tiu ununura ŝanco. Por la trasiberiaj lernantoj laŭeble senpaga
partopreno en la kongreso (eĉ se nur por kelkaj aranĝoj lauvice) kaj laŭeble
gastigado ĉe pekinaj familioj………….
(Tio nature dependas de la cirkonstancoj kaj de la regularoj kaj tial tion povas aranĝi nur respondeculoj!)
Atingis min dekoj kaj dekoj da leteroj de interesitoj pri la vojaĝo kaj gratulleteroj pri la ideo. Kelkaj, mi legis en mesaĝoj de diskutgrupoj, klopodis eĉ realigi per propraj fortoj la vagonaron sed devis rezigni pro pluraj kialoj inter kiuj la manko de la necesa tempo. Neniu tamen pensis turni sin al internacia turisma agentejo, kiu prenu sur si la tutan organizadon lanĉante la allogan vojaĝon per sia reto en ĉiuj landoj kaj tiele agante kiel potenca tonkesto. Tiun paŝon devus memkomreneble fari nur persono kiu povas prezenti la U.K., oferti kondiĉojn, proponi instruistojn ktp kaj ne entuziasmulo kun ĉapelo, trikoto kaj insigno kun verda stelo!
Nun, kiel dirite kaj kiel ĉiuj povas intuicii, la projekto estas ankoraŭ valida sed en inversa direkto: de Ekstrema Oriento al Moskvo-Vilnius kaj ekzistas nun viro laŭ mi ege entreprenema kaj klarvidema, kiu estas ĝuste la organizanto de la ĉijara U.K. en Vilnius, Povilas Jegorovas- la ĉimomenta viro kiu kapablas troviĝi samtempe en pluraj lokoj malproksimaj unu de la alia kaj ĉiam bonhumora- kies senretorika efikeco impresis min dum ĉijara BET de li mirinde organizita, kiu kapablus trovi la ĝustan vojon por efektivigi ĉijare la projekton helpata de sia eksterordinara teamo de kunlaborantinoj. La ideo cetere intertempe maturiĝis kaj fariĝis pli klara verŝajne ankaŭ ĉe aliaj respondecaj gravuloj kiuj volonte kunlaborus por ke baldaŭ oni tamtamu tra la mondo nian mesaĝon.
Fakte la projekto TEV havas pleje informan kaj merkatadan valoron kaj tial mi, kiu interesiĝas pri informado, pasiiĝis por ĝi. Vagonaro, kiun oni prenas ne konante lingvon kaj oni forlasas ĝin konante sufiĉe la lingvon por partopreni kongreson, kreas novaĵon, kiun volonte anoncus ĉiuj amaskomunikiloj kaj ĉiuj turismaj agentejoj interesitaj.
Giorgio Bronzetti direktoro de Disvastigo