Aperis la aktoj de la Hanoja Esperantologia Konferenco

Sub la titolo "Leksikologio, frazeologio, historio, semantiko kaj terminologio: du kontinentoj renkontighas en Hanojo" aperis la aktoj de la 35-a Esperantologia Konferenco, kiu okazis en la 97-a Universala Kongreso de Esperanto en Hanojo en 2012. La volumon redaktis Christer Kiselman kaj Mélanie Maradan, kiuj ankau gvidis la konferencon.

La Esperantologiaj Konferencoj estas organizataj de Centro por Esploro kaj Dokumentado pri Mondaj Lingvaj Problemoj (CED), la esplora brancho de UEA, kaj ili okazas en chiu UK ekde tiu en Varno en la jaro 1978.

En Hanojo okazis kvin prelegoj. Tiu de Nguyen Xuan Thu estas vershajne la unua publikigajho pri la temo, kiel esperantigi vjetnamajn nomojn. La kontribuajho de Kadoja Hidenori pri la konfronto inter frazeologio kaj lingvaj rajtoj estas firma kritiko de pluraj nuntempaj fenomenoj en Esperanto kaj esperantologio. La studo de Ilona Koutny traktas semantikajn modelojn kaj vortfaradon en pluraj lingvoj kompare al tiuj de Esperanto.

La prelego de Heidi Goes pri la historio de la indonezia Esperanto-movado estas unu el la rezultoj de shiaj esploroj, ankau surlokaj; la alia estis restarigo de tiu delonge mortinta movado. Fine, Mélanie Maradan prezentas la vivon kaj verkon de Eugen Wüster kaj shian opinion pri terminologia laboro ghenerale kaj pri la fonda kontribuajho de Wüster aparte.

"Leksikologio, frazeologio, historio, semantiko kaj terminologio", A4-formata kaj plaste kovrumita, havas 65 paghojn. Ghia prezo che la Libroservo de UEA estas €10,50 (plus sendokostoj kaj, en EU, imposto de 6%; triona rabato ekde 3 ekz.).