Stefano Keller invitis UN-kunsidantaron al Universala Kongreso

Paralele kun la 23a sesio de la Homrajta Konsilio, disvolvighis la 6an kaj 7an de junio la "Fakula kunsido pri la rajtoj kaj sekureco de religiaj minoritatoj" en la chefa Oficejo de la Alta Komisiito de UN pri Homaj Rajtoj en Ghenevo. La kunsidon gvidis Rita Izsák, la UN-chefo pri minoritataj aferoj.

La komisiitoj de UEA Verena Graf kaj Stefano Keller partoprenis la eventon. Krom kelkaj shtataj reprezentantoj cheestis pluraj fakuloj, juristoj, raportantoj de UN kaj delegitoj de NRO-j.

Post prelegoj pri la bazaj konceptoj, diversaj kazoj kaj situacioj estis prezentitaj. Koncerne rajtojn kaj sekurecon pri religi-rilataj aferoj, la realeco povas esti tre kompleksa lau tio, chu temas pri rilato inter anoj de religio kaj la shtato, au inter la religia komunumo/gvidantaro kaj ties anoj, kaj lau tio, chu temas pri ‘shtatreligio’, ktp. Libereco pri praktikado kaj geedzighaj, religio-shanghaj situacioj estis prezentitaj. La aliro de la problemoj povas esti ech pli komplika, kiam temas pri diversaj identecaj aspektoj samtempaj: etna, religia au lingva apartenoj.

Temis ankau pri la efiko de la "etikedo", t.e. nomado, kion la anoj de iu minoritata grupo ricevas kaj kiuj difinas ilian minoritatgrupan apartenon. Tio povas esti perceptata kiel io pozitiva (ekz. "religia komunumo" estas pli pozitiva ol "sekto"), au negativa ("minoritata", do pli "malaltrangula" ol la aliaj). Kelkfoje la minoritata statuso povas doni al civitanoj privilegiojn rilate al la plimultanoj.

Reprezentantino de la Internacia Bahaa Komunumo interparolis kun la komisiitoj de UEA kaj klare esprimis sian simpation al la Esperanto-movado; la bahaanoj ja deziras uzi komunan interkomprenan lingvon neutralan.

Antau la fino de la kunsido, Stefano Keller kiel la lasta alparolanto reagis al la disvolvigho de la evento, bedaurante ke ghi okazis nur en la angla lingvo, sen interpretistoj kaj sen eblo uzi alian UN-lingvon. Li atentigis, ke sekve pluraj interesatoj estis elfermitaj de la kunsido. Li alvokis pri serioza konsidero de la lingva aspekto de komunuma kunvivado, pledante por pli da atento al tiu grava komponento de la homaj rajtoj.

Sian alparolon li finis invitante la kunsidantaron al la UK en Rejkjaviko, kie ghuste la temo "justa komunikado" estos traktata.

Sonregistrajho de la alparolo rete atingeblas che http://goo.gl/uiNl. 
La teksto aperos che http://www.linguistic-rights.org/eventoj/ kaj en la retejo de UN.

Tiu kunsido ebligis al la estrarano de UEA transdoni al s-ino Rita Izsák ekzempleron de la junia numero de la revuo "Esperanto", en kiu aperas shia teksto pri Esperanto 125-jara.